АКМАЛ САЙЙИД

ОЙ ТЎЛГАН ТУНДА

Қиссалар.
Шеърлар.
Адабийқайдлар.

А. Навоий номидаги Ўзбекистон Миллий кутубхонаси нашриёти
Тошкент - 2006



КЎНГИЛ КЕНГЛИКЛАРИДА

Адабий асар авваллари мамлакат пойтахтида яратилиб, нашр этилиб, кейин мухлислар кўлига етиб борарди.
Ҳозирда бунинг учун вилоятларда ҳам у ёки бу даражада ўзига хос имконият вужудга келди. Энди ёзувчи ва шоирлар ўз иқтидорларини намойиш қилишлари учун Тошкент кўчаларида таҳририяту нашриётлар остоналарида сарғайишлари шарт эмас. Вилоятлардаги нашриётларда бемалол китоб чиқаришлари мумкин. Лекин бу умрбоқий асар яратиш осонлашди, дегани эмас. Бинобарин, адабий асарга талаб ҳамон ўша-ўша. У бадиияти, самимияти билан яхши инсон руҳиятининг кўзгуси бўлиши зарур. Шунингдек, ижодкор айтмокчи бўлган гап юракларда акс-садо бериши лозим. Қолаверса, машҳур Абдулла Қаҳҳор айтганларидек, ёзилган ҳар бир “китоб завқ-шавқ билан ўқилишикерак".
Очиғини айтишимиз даркор: юқоридаги имкониятлардан нотўғри фойдаланаётганлар ҳам йўқ эмас. Хусусан, кўплаб нашрлар талаб даражасида эмас. Қўлида пули бор одам хомаки асарларини ҳам китоб қилиб чиқаришнинг пайидан бўлишаяпти. Лекин улар орасида машаққат ва меҳнат билан ижод қилаётган иқтидор эгалари ҳам йўқ эмас. Ана шундай истеъдод эгаларидан бири - ғузорлик Акмал Саййид (Абдураҳмонов)дир.
Бу чоққача Акмал Саййиднинг ”Илҳом азоби" шеърлар тўплами (1994), ҳаммуаллифликдаги ”Боқий сўз мулкида" китоби (1997) ҳамда ” Мольберт кўзлари" қисса-монологи (1999) Қаршидаги ”Насаф” нашриёти томонидан чоп этилиб, мухлислар эътиборини ўзига тортган.
Мен бу камтарин, камсуқум, зукко йигит билан ижодий сафар давомида танишиб қолдим. Туман газетаси бўлими бошлиғи журналист Замира Маматқулова ҳамда Ғузор халқ таълими бўлими ходими Даврон ака Ўринов бунга сабабчи бўлишган. to'liq matn